GENERAL SANTOS CITY – Gapanawagan ang kapulisan sa publiko nga likayan ang pag-post dayon sa social media kung adunay mga kakulian, krimen, o kalit nga insidente nga makit-an.
Mas maayo nga ipa-abot dayon sa labing duol nga police sttaion aron dali kining matubag ug masulbad.
Sa pamahayag ni Police Captain Joseph Letigio, usa sa mga opisyal sa General Santos City Police Office (GSCPO), nga mas epektibo ang aksyon sa kapulisan kon direkta nga mareport ang usa ka panghitabo.
Usahay sa mga nag-viral sa social media makahatag pa og kasamok ug sayop nga impormasyon.
Gipasabot usab ni Letigio nga daghan na silang nadawat nga kaso nga gi-post una sa social media, apan tungod wala dayon mareport sa mga otoridad, nalangan ang imbestigasyon ug pagresponde.
Giawhag sa kapulisan ang tanang katawhan nga gamiton ang social media sa hustong paagi, apan sa mga seryosong insidente, unang buhaton ang pag-report sa kapulisan pinaagi sa emergency hotline o personal nga pagduol sa presinto.
Nagpabiling abli ang GSCPO sa tibuok oras aron motubag sa tanang sumbong ug reklamo gikan sa katawhan.
