GENERAL SANTOS CITY – Hugot nga gipatutukan ni P/C/Supt. Eliseo Rasco, regional director sa Police Regional Office-12 ang natigayong pagbusikad sa Crossing Makar, Brgy Apopong, ning syudad.
Nasayran nga walo ka tawo ang angol sa maong pagpabusikad sa Improvised explosive device (IED). Sa pakighinabi sa Bombo Radyo GenSan, gibutyag ni Rasco nga usa ka ‘act of terrorism’ ang panghitabo.
Sa iyang pahayag, hulaton ang resulta sa post blast investigation aron masayran kung unsang grupo ang responsable sa panghitabo.
Narekober sa blast site ang mga concrete nails nga 1 inch ang gitas-on.
Sa inisyal nga imbestigasyon sa kapulisan, usa ka motorsiklo ang mihunong atubangan sa Lying Inn Clinic og minaug ang duha ka wala mailhing lalaki.
Nangutana ang mga nahisgutan kung asa adunay nagbaligya og baboy og gitubag kini nga wala, gilayon nga mihawa sa lugar kung asa gibilin ang daw usa ka package nga gibutang sa plastic bag.
Sa pahayag sa usa ka testigo, dihang makalayo sa lugar ang mga suspek sakay sa motorsiklo didto na natigayon ang pagbusikad.
