GENERAL SANTOS CITY – Kapin tunga sa milyon ka pesos ang gikataho nga damyos sa natigayong pagkasunog sa tulo ka panimalay sa Prk Olano, Brgy Magsaysay, Polomolok, South Cotabato, Miyerkules sa hapon.
Ugdaw ang tulo ka balay kung asa naangin pa ang usa ka tindahan ug duha ka jeep, ug walay gamit nga nasalbar ang mga tagbalay.
Matud sa Polomolok Fire Station, anaa sa advance stage na ang kalayo dihang nakaresponde ang kabomberuhan, gumikan wala gilayon na-report kanila ang insidente.
Sa imbestigasyon, nagsugod ang kalayo sa panimalay ni Ernesto Balabat Sr., human matud pa gisindihan sa iyang 24-anyos nga anak nga si Ernesto Jr., ang mga sanina gamit ang lighter.
Base sa taho, kanhing drug surrenderee ang suspek, ug nakasinati ug depresyon.
Gikumpirma kini sa mga ginikanan sa suspek hinungdan nga kasamtangan kining balhug sa Polomolok Municipal Police Station ug nag-atubang ug kasong arson.
Sa kinatibuk-an, mukabat sa P650,000 ang natala nga damyos, ug kasamtangang nagpadayon ang imbestigasyon.
