GENERAL SANTOS CITY – Kapin tunga sa libo ka tawo na ang naaresto sa kapulisan sa tibuok Region 12, alayon sa nagpadayong hugot nga kampanya sa gobyerno batok sa iligal nga droga.
Base sa natala sa Police Regional Office 12 (PRO 12) sa unang upat ka bulan sa 2018, anaa sa kinatibuk-ang 599 ang nasikop nga drug personalities, kung asa 515 niini ang pushers ug 84 ang users.
Samtang, 45 ka tawo matud pa ang napatay atul sa police operations, kung asa 43 ang pushers ug duha ang users. Base sa record sa Regional Investigation and Detection Management Division (RIDMD), mukabat sa 537 ka drug operations ang napahigayon.
Kahibaluan nga dinhi pa lang sa GenSan, nakatala na ang General Santos City Police Office (GSCPO) ug 126 ka operasyon, kung asa nasikop ang 19 ka drug users ug 125 ka pushers, ug upat ang napatay; samtang sa Sarangani Police Provincial Office (SPPO) adunay 26 ka operasyon, kung asa 26 ka pushers ang nasikop, ug tulo ka pushers usab ang napatay.
Matud ni PCSupt Marcelo C Morales, Regional Director sa PRO12, nga ang naasoy’ng dakong ihap ang gumikan sa hugot nga implementasyon sa Oplan Manhunt Charlie batok sa mga wanted persons sa rehiyon, isip suporta sa marching orders ni Pangulong Duterte.
