Kapin sa 40 ka mga tawo nga giingong maoy nagpasiugda sa anti-corruption protest niadtong Septiyembre 21 ning tuiga mag-atubang og kasong kriminal.
Matod ni Criminal Investigation and Detection Group (CIDG) Major General Robert Alexander Morico III, ang mga respondents naglakip sa mga tigpasiugda sa kagubot nga gilusad sa nagkalain-laing grupo nga gitawag og Trillion Peso March.
Nagtak-om ang opisyal sa CIDG sa dihang gipangutana bahin sa pagkatawo sa mga indibidwal nga gipasakaan og kaso.
Target sa CIDG nga mapasakaan na sila og kaso sa sunod semana bisan og wala niini gitumbok kung unsa nga mga kaso ang ipasaka.
Hinuon giinsister ni Maj Gen Morico nga ilang gisusi ilabina ang mga nalambigit, dili lang mga gagmay nga indibidwal kon dili lakip na ang mga dagkong personalidad.
Kahinumdoman nga atol sa dakong kalihukang protesta niadtong Septiyembre 21, dunay mga demonstrador ang miguba sa pipila ka mga kabtangan sa gobiyerno, busa matod sa kadagkoan sa CIDG, kinahanglang manubag ang mga utok sa kapintasan.
