Gipasalig sa Department of Migrant Workers (DMW) nga andam silang motabang sa mga Overseas Filipino Workers (OFWs) sa Estados Unidos, kinsa gilaumang maapektuhan sa posibleng mass deportation kalabot sa kausaban sa mga polisiya sa US ubos sa administrasyon sa bag-ong napili nga Presidente sa US nga si Donald Trump.
Matod ni DMW Sec. Hans Leo Cacdac, gibanabana nga mokabat sa 370,000 ka undocumented Pinoy immigrants sa US ang posibleng maapektuhan sa proposal sa U.S. Mass Deportation Policy, nga nagtarget sa pagdeport hangtod sa 1 ka milyon nga dili dokumentado nga mga imigrante matag tuig.
Kahinumdoman nga mokabat sa 300,000 ka mga undocumented immigrants ang gipa-deport matag tuig sa unang termino ni Trump o gikan sa 2017 hangtod 2020. Diin mga 3,500 ka Filipino ang namalik sa Pilipinas.
Matod ni Cacdac, andam na ang pinansyal, medikal, ug legal nga tabang sa ahensya alang sa mga apektadong Pilipino sa US.
Pinaagi sa National Reintegration Center for OFWs, ang maong ahensya motabang usab sa retooling, reskilling, ug employment facilitation sa mga apektadong trabahante. Kini giingong pinaagi sa pakigtambayayong sa DOLE, DTI ug TESDA.
