Laing kalampusan ang naangkon sa agribusiness sector sa Davao Region human makapadala ang Department of Agriculture Regional Field Office 11 (DA-RFO 11) og 17.2 metric tons nga preskong mga produktong agrikultural nga nagkantidad og hapit P800,000 ngadto sa Saudi Arabia.
Ang kargamento nga gipadala niadtong Hulyo 24 naglangkob sa 1,350 ka kahon sa Cardava nga saging, 50 ka kahon sa kamote, ug 50 ka kahon sa singkamas.
Ang mga produkto gi-eksport sa Gerb Golden Hands Corp. sa Sto. Tomas, Davao del Norte ug gipadala ngadto sa Rana Mohammed Saleem Commercial LLC sa Jeddah, Saudi Arabia.
Matod ni DA Regional Executive Director Macario Gonzaga, nagpakita kini nga ang pag-apil sa international trade exhibition dili lang alang sa promosyon kondili nakahatag usab og tinuod nga oportunidad sa merkado alang sa mga mag-uuma ug exporters sa rehiyon.
Dugang pa niya, ang matag malampusong export shipment nagpalig-on sa reputasyon sa Davao Region isip kasaligan nga tinubdan sa dekalidad nga mga produktong agrikultural ug nag-abli pa og dugang nga mga oportunidad sa eksport.
Sumala sa DA, ang maong export deal namugna pinaagi sa mga negosyo nga naporma atol sa AGRA Middle East Exhibition 2024 sa Dubai.
Gipadayag usab ni Agriculture Secretary Francisco Tiu Laurel Jr. nga ang pagpalapad sa merkado sa mga produktong agrikultural sa Pilipinas makatabang aron modako ang kita sa mga mag-uuma, mamenosan ang trade deficit sa nasud, makadani og dugang pamuhunan sa modernong pagpanguma ug logistics, makamugna og trabaho sa mga komunidad sa kabanikanhan, ug makapalig-on sa kompetisyon sa sektor sa agrikultura.
