Malampusong nasakmit sa Philippine Drug Enforcement Agency (PDEA) ug Philippine National Police (PNP) ang drugas nga gibanabanang mobalor og P6.8-bilyones sa probinsiya sa Pangasinan.
Ang operasyon gihimo pinaagi sa pagpatuman sa search warrant sa usa ka bodega nga nahimutang sa Barangay Laois, Labrador sa probinsiya sa Pangasinan niadtong Oktubre 3 sa gabii.
Nasakmit sa mga otoridad ang kapin sa 900 ka plastic tea bags nga adunay sulod nga gidudahang shabu, nga motimbang og usa ka kilo.
Sa kinatibuk-an, kapin sa 900 ka kilo sa ilegal nga drugas ang nakumpiska sa nasangpit nga lugar.
Walay nakitang personalidad ang mga otoridad sulod sa bodega dihang ilang gironda.
Matod sa PDEA, follow-up operation lang kini sa pagkasikop sa duha ka mga indibidwal nga nasakmitan og kapin sa P800-M nga kantidad sa drugas sa lungsod sa Bugallon sa lalawigan sa Pangasinan niadtong Huwebes, Oktubre 2.
Padayon pa nga gipangita sa mga otoridad ang mga suspek nga nagpaluyo sa pagpamaligya og ilegal nga drugas sa probinsiya sa Pangasinan.
