Nigahin ang gobyerno ug P274.926 bilyon aron pondohan ang flood control projects ubos sa 2026 National Expenditure Program (NEP).
Matod ni Budget Secretary Amenah Pangandaman, sa nasampit nga pundo, P272.33 bilyon ang para sa Department of Public Works and Highways (DPWH) alang sa ilang Flood Management Program samtang ang nahabiling P2.593 bilyon adto sa Metro Manila Development Authority (MMDA) alang sa ilang Flood Control Program.
Kini alang sa operasyon ug pagdumala sa nagkalain-laing pumping stations sa National Capital Region.
Ang budget sa MMDA mao ang pagpalambo sa flood control sa Metro Manila aron daling mohubas ang baha.
Matud ni Pangandaman nga ang maong mga proyekto girekomenda sa duha ka ahensya.
Gitataw ni Pangandaman nga base sa ilang budget call, ilang gipasalig ang DPWH ug MMDA nga kinahanglang adunay saktong pagplano ug feasibility studies ug pag-ila sa mga lugar nga ilang ibutang sa mga proyekto.
Sa laing bahin, si House Committee on Appropriations Chairman Rep. Mikaela Suansing miingon nga atol sa paghatag sa budget, ilang tukion ang mga flood control projects ug ang matag rehiyon kinahanglang mopresenta ug kinatibuk-ang plano sa pagpaminus sa pagbaha ug pagsiguro nga ang maong proyekto anaa gayud.
