-- ADVERTISEMENT --
GENSAN – Gibanabanaang anaa sa P105,000 ang natala nga damyos human masunog ang usa ka panimalay sa Prk 1 Poblacion, Alabel, Sarangani miaging adlaw.
Kahibaluan nga naugdaw gayud ang panimalay nga gipanag-iyahan sa pamilya Baton, kung asa wala gayud silay nasalba nga bisan usa nga gamit.
Sa imbestigasyon sa Bureau of Fire Protection, gituuhang nagsugod ang kalayo sa gidulaan nga posporo sa mga bata.
Posible matud pang misamot ang kalayo gumikan sa makusog nga hangin ug init nga panahon.
Hinuon, maayo na lamang nga walay nasakitan sa pamilya nga tag-iya sa balay, ug wala na mikatag pa sa katapad nga balay ang kalayo.
-- ADVERTISEMENT --
Gumikan niini, subling nagpahimangno ang kabomberuhan ngadto sa publiko nga mag-amping sa kanunay aron makalikay sa sunog.
