GENSAN – Kapin libo ka mga iligal nga pabuto lakip ang boga ang gipangguba sa General Santos City police karung adlawa.
Ang seremonya sa pagguba sa mga nakumpiska nga gidili nga pabuto ug mga improvised nga boga ang gipangunahan sa Police Regional Office 12 nga girepresentahan ni PCol. Harold Salazar Ramos, Chief sa Regional Staff, kung asa gipahigayon kini sa Camp Lira Oval Ground kaganihang buntag.
Matud ni PCol. Nicomedes Olaivar Jr, City Director sa GSCPO, kini nga kalihokan nagpasiugda sa nagpadayon nga kampanya sa PRO12 ug sa mga kauban niini aron masumpo ang paggamit ug pag-apod-apod sa ilegal nga mga pabuto, pagsiguro sa kaluwasan sa publiko ug pagpalambo sa usa ka palibot nga walay pabuto.
Sa pamahayag ni PCol. Olaivar ang nasakmit sa mga kapulisan atol sa operasyon sugod December 16-26 ning tuiga. Nasayran nga ang mga nakumpiskang illegal nga mga pabuto ang gisulod sa drum og dayon gibasa og tubig. Samtang ang mga nakumpiska nga mga boga ang gipang-maso.
