Nipasalig si Department of Economy, Planning, and Development (DEPDev) Sec. Arsenio Balisacan nga ilang susihon ang kapin sa 9,000 ka flood control projects base sa direktiba ni President Ferdinand Marcos Jr.
Sa interpelasyon ni House Committee on Public Accounts Chair Terry Ridon atol sa budget briefing sa Development Budget Coordination Committee (DBCC), ang kalihim niingon nga plano nila nga susihon ug i-review ang mga dagkong proyekto gikan sa 2022 hangtod 2025.
Kabahin sa ilang stratehiya mao ang pagdetermina kon tinuod ba nga natukod kini nga flood control project, functional ba kini o partially operational o depekto ug epektibo ba gyud kini sa pagpugong o pagpamenos sa pagbaha.
Gipasabot ni Balisacan nga dili apil sa ilang pagrepaso ang pagtino kon kinsay sad-an o dili.
Apan matud niya nga ang resulta sa ilang imbestigasyon magamit sa mga ahensya sama sa COA, Ombudsman o DOJ sa paghimo og kaugalingong imbestigasyon ug pagpasaka og mga reklamo.
