GENERAL SANTOS CITY – Temporaryo nga mipasilong sa gymnasium sa Barangay Calumpang ning syudad ang mga biktima sa sunog kagahapong adlawa sa Purok San Juan ug Purok Mendoza.
Matud pa nga mukapin sa otsenta ka mga panimalay ang naugdaw luyo nga adunay pipila ka residente ang nakapanghakot pa sa ilang mga gamit samtang ang uban ang abo na dihang maabtan ang ilang gipuy-an.
Matud ni Rey Mara nga pipila sa iyang mga silingan ang nakapanghakot pa sa ilang kabtangan apan gilihok usab ang mga kawatan hinungdan nga adunay nawalaan sa ilang mga gamit.
Gani nagpadayon ang pag-imbestiga sa kabomberuhan sa sinugdanan sa kalayo.
Gitudlong hinungdan sa paspas nga pagkatag sa kalayo ang init nga panahon nga nasinati-an.
Miresponde usab sa lugar ang mga sakop sa City Social Welfare and development Office aron matabangan ang mga biktima pinaagi sa paghatag sa nag-unang panginahanglanon sama sa pagkaon ug sapot masul-ob.
