Miabot na sa kapin 6,000 ka kabalayan sa lalawigan sa Albay ang naapektuhan sa ashfall human sa pag-alburoto sa Mayon Volcano niadtong Sabado, sumala kang Albay Governor Noel Rosal.
Matod niya, ang pagkahugno sa lava dome sa bulkan maoy hinungdan sa ashfall nga nakaigo sa mga lungsod sa Guinobatan ug Camalig, ilabi na sa Guinobatan diin miabot sa usa hangtod duha ka pulgada ang gibag-on sa abo.
Personal usab nga mibisita si DPWH Sec. Vince Dizon aron inspeksyonon ang clearing ug flushing operations sa mga apektadong lugar, samtang maagian na usab ang Maharlika Highway paingon sa Naga City.
Bisan pa sa insidente, wala’y natalang namatay o nasamdan tungod sa kaandam sa mga residente, apan adunay mga nataho sa pagkamatay sa pipila ka binuhing mananap ug pagkadaot sa mga tanom tungod sa ashfall.
Gimandoan sa lokal nga gobyerno ang pagsul-ob og face mask, ilabi na ang N95, tungod sa peligro sa abo sa panglawas, labi na sa mga bata.
Sa pagkakaron, adunay 1,238 ka evacuees gikan sa sulod sa unom ka kilometro nga Permanent Danger Zone (PDZ), ug gitun-an usab ang posibilidad sa pagpalapad niini ngadto sa pito ka kilometro nga makaapekto sa dugang 10,000 ka pamilya.
Nagpabilin sa Alert Level 3 ang bulkan sumala sa Philippine Institute of Volcanology and Seismology, nga nagpasabot nga aduna gihapoy hulga sa mas kusog nga pagbuto, samtang nangayo na og dugang tambal ang mayor sa Camalig nga si Carlos Irwin Baldo Jr. gikan sa Department of Health aron malikayan ang mga sakit dala sa ashfall.
