GENSAN – Gipangunahan ni Mayor Lorelie Geronimo-Pacquiao ang seremonya sa pagpanagtag sa allowance ug uniporme alang sa 664 ka mga atleta ug coaches ning dakbayan nga moapil sa Batang Pinoy GenSan 2025.
Kauban sa kalihokan si LnB President Hon. Alberto “Bobby” Pacquiao ug SK Federation President Elijah Joanne Polistico-Pacquiao.
Matag atleta nakadawat og ₱7,650 nga training ug meal allowance isip suporta sa ilang pagpangandam alang sa umaabot nga kompetisyon.
Sa iyang mensahe, gihagit ni Mayor Pacquiao ang mga atleta nga ipakita sa tibuok nasud nga ang General Santos City mao gyud ang “Home of the Champions.”
Gipasalamatan usab sa mayor ang tanang atleta ug coaches sa ilang dedikasyon ug pagpangandam.
Gipahimangnoan usab niya sila nga magpabilin nga matinahuron ug mahimong maayong ehemplo sa mga bisita sa siyudad.
Ingon pa ni Mayor Pacquiao, ang tinuod nga kampeon dili lang sukdan sa kadaugan, apan makita usab sa pagkamasinabtanon ug maayong pamatasan.
