GENERAL SANTOS CITY – Nailog sa kapulisan ang mga ginabas nga kahoy nga gipalutaw sa kadagatang bahin sa Kiamba, Sarangani Province.
Matud ni Police Chief Instr. Rey Salgado, hepe sa Kiamba Municipal Police station nga mukapin sa 600 ka board feet nga lawaan specie ang kustudiya karon sa MENRO sa Kiamba.
Nakadawat matud pa ug tip ang kapulisan nga adunay gipaanud sa sapa nga mga ginabas nga kahoy padulong sa kadagatan nga bahin sa Poblacion KIamba.
Naabtan matud pa sa kapulisan nga adunay mga bata nga nagbantay niini apan nanagan samtang gapaduol pa lamang sa dapit.
Kini na ang ikatulo nga higayon nga nasakpan sa kapulisan ang palusot unta sa ginabas nga lawaan.
Gipasalamatan usab sa kapulisan ang partisipasyon sa katawhan nga maoy nagpaabut ug taho ngadto kanila.
Gani nagpahigayon na kaniadto ug briefing ang kapulisan kalabutan sa importansiya sa kahoy sa palibut.
Kahinumduman nga usa kini sa proyekto sa task Force kalikasan sa probinsya sa pagpanguna ni Governor Steve Chiongbian Solon.
Ang nahisgutang grupo maoy mupasaka ug kaso sa mga madakpan nga magpalusot sa kahoy ug uban pa nga adunay kalabutan sa kinaiyahan.
