Gikabalak-an nga kapin 500 ka tawo ang namatay human naunlod ang duha ka bangka sa kadagatan sa Myanmar sa miaging mga adlaw, sumala sa taho sa mga ahensya sa United Nations.
Nawad-an og kontak ang unang bangka human kini mobiya nga adunay sakay nga gibana-banang 250 ka tawo.
Gituohang naunlod usab ang ikaduhang bangka sa dapit sa Ayeyarwady coast sa Myanmar nga adunay mga 280 ka pasahero.
Kadaghanan sa mga pasahero mga Rohingya Muslim refugees nga sakop sa minorya nga grupo.
Sumala sa UN High Commissioner for Refugees (UNHCR) ug International Organization for Migration (IOM), mibiyahe ang maong mga bangka gawas sa regular nga “sailing season” diin mas delikado ug kusog ang balod sa dagat.
Kasagaran mosakay ang mga Rohingya sa mga kahoy nga bangka aron makaikyas gikan sa kapintas sa Myanmar ug sa huot nga mga refugee camp sa Bangladesh.
Ang ilang tumong mao ang makaabot sa mga silingang nasud sama sa Malaysia, Indonesia, o Thailand, uban sa paglaom nga makabaton og kaluwasan ug mas maayong oportunidad.
