Padayon nga nalubog sa baha ang 574 ka lugar sa nasud tungod sa hiniusang epekto sa mga bagyong Luis, Maymay, Neneng ug habagat. Sumala sa Office of Civil Defense (OCD), dili moubos sa 1 ft. ang giladmon sa tubig-baha.
Sa Central Luzon ang adunay pinakadaghang lugar nga padayon gihapon nga nalubog sa baha nga mikabat sa 446. Kini ang rehiyon nga labing naapektuhan sa walay hunong nga pag-ulan sa miaging mga semana.
Gisundan kini sa Mimaropa nga adunay 42 ka lugar nga padayon nga gibahaan; Ilocos Region, 35 ka lugar; Western Visayas, 26; samtang Calabarzon, 25 ka lugar.
Kalabot niini, gipahibalo sa OCD nga nakahatag na ang gobyerno og P1.1 billion nga kantidad sa ayuda ngadto sa mga komunidad nga naapektuhan sa kalamidad.
Gipahayag usab ni OCD Information Officer Diego Mariano nga nakigtambayayong na sila sa mga otoridad aron matubag ang padayon nga pagbaha, ilabina sa probinsya sa Pampanga.
