Gipahigayon sa Gaza City ang dako nga lubong alang sa labing menos 50 ka mga Palestinian kansang mga patayng lawas bag-o lang nakit-an ug nakuha gikan sa mga kagun-oban sa mga gusaling nadaot atol sa gubat sa Gaza.
Sumala sa mga tigluwas, ang mga lawas narekober gikan sa mga lugar nga giigo sa mga airstrike sa unang mga bulan sa gubat, ilabina sa mga lugar sa Tal al-Hawa, Zeitoun, Sabra, Sheikh Radwan ug Shati.
Ang mga biktima sakop sa nagkalain-laing pamilya, lakip ang mga pamilya nga al-Sawafiri, al-Batniji ug Gharbiya.
Padayon usab ang pagpangita sa mga patayng lawas sa ubang mga nawagtang nga Palestinian. Gibanabana sa Gaza Civil Defence nga mokabat sa 8,000 ka mga tawo ang hangtod karon wala pa makaplagan ug gituohang natabonan sa mga kagun-oban.
Nanawagan usab ang Gaza Ministry of Health nga tugotan ang pagsulod sa mga bug-at nga makinarya, kagamitan alang sa search ug recovery operations, ug mga suplay alang sa forensic medicine aron mapadali ang pagpangita ug pag-ila sa mga biktima.
