Kapin sa 400 ka tawo nga gidudahang nagtrabaho sa Philippine Offshore Gaming Operator (POGO) hub ang nasikop sa laing raid sa Pasay City.
Ang Presidential Anti-Organized Crime Commission (PAOCC), Philippine National Police – Criminal Investigation and Detection Group, ug uban pang ahensya sa gobyerno maoy nangulo sa operasyon sa usa ka condominium nga duol lamang sa headquarters sa National Bureau of Investigation.
Matud kang PAOCC spokesman Winston Casio, ang nasampit nga hub nalakip sa pila ka network sa POGO operations sa tibuok nasod.
Sa Metro Manila, gidudahang kabahin usab kini sa dakong network sa POGO nga adunay koneksyon sa mga operasyon sa POGO sa Parañaque, Makati, Las Piñas, ug ubang bahin sa Pasay City.
Gilauman nga mopagawas ang mga otoridad og opisyal nga datos kalabot sa raid, lakip na ang kinatibuk-ang ihap sa mga langyaw nga trabahante nga giingong nalambigit sa operasyon.
