Daghan na matod pa ang napriso ug napasakaan og kaso sukad nabutyag ang dakong korapsyon sa mga flood control ug uban pang public infrastructure projects sa tibuok nasud.
Sumala kang DPWH Secretary Vince Dizon, nasabtan sa administrasyon ang kasuko sa publiko tungod sa mga nabutyag nga anomalya, apan kinahanglan nga magmatngon ang gobyerno sa pagpasaka og mga kaso batok sa mga nalambigit niini.
Sa pagkatinuod, miabot na sa kapin sa 30 ka indibidwal ang napriso ug napasakaan og kaso sukad sa State of the Nation Address ni Pangulong Ferdinand Marcos Jr. niadtong 2025 nga nahimong sinugdanan sa sunod-sunod nga mga imbestigasyon.
Matod ni Dizon, dili ordinaryong mga personalidad ang naapil sa mga kaso kondili mga magbabalaod, mga opisyal sa DPWH, district engineers, contractors, ug bisan ang kanhing kalihim nga gitudlo ni Pangulong Marcos nga si Manny Bonoan.
Giingon usab niya nga dili sayon ang paghimo sa case build-up ug pagdumala sa serye sa mga imbestigasyon, maong gisiguro sa administrasyon nga dili basta-basta mabasura sa korte ang mga kasong ilang gipasaka batok sa mga nalambigit sa korapsyon.
Gipasiugda ni Dizon nga dili “gagmayng isda” ang mga napriso tungod sa maong iskandalo, lakip ang magtiayon nga sila Curlee ug Sara Discaya, si Senador Jinggoy Estrada, ug kanhing Senador Ramon Revilla, bisan pa sa mga kritisismo gikan sa mga kontra sa administrasyon.
Dugang pa niya, nagpadayon ang DPWH sa pagsusi sa tanang proyekto nga adunay bahid sa korapsyon ug wala kini pasagdi bisan naglabay ang panahon. Misaad usab ang kalihim nga mas daghan pa ang mapriso ug mapasakaan og kaso sa umaabot samtang nagpadayon ang case build-up ug ang pagrekomendar sa mga kaso ngadto sa Office of the Ombudsman.
