GENSAN – Niabot na sa kapin 2,179 ka sunod-sunod nga linog ang nasinati sa Sultan Kudarat sukad Enero 19 hangtod karong Enero 29, sumala kang Beverly Anne Santos, Information Officer sa Office of Civil Defense Region XII (OCD XII).
Matud ni Santos, andam ug abli ang tanang evacuation centers sa Lebak ug sa mga kasikbit nga lugar kon adunay kusog nga pagtay-og. Giklaro usab niya nga walay gilauman nga tsunami nga resulta sa mga linog.
Tungod sa kahimtang, gisuspinde ang daghang klase ug trabaho, lakip na sa Dakbayan sa General Santos, ug magpadayon kini hangtod Enero 30 aron masiguro ang kaluwasan sa katawhan.
Nagpahinumdom ang OCD XII sa publiko nga kon kusog ang lindol, lumikas dayon padulong sa pinakaduol nga evacuation center ug magpabiling alerto sa tanang pahibalo gikan sa lokal nga kagamhanan.
Gihangyo usab ang mga residente nga mag-andam og emergency kit, pagkaon, tubig, ug uban pang kinahanglanon aron masiguro ang kaluwasan sa pamilya ug komunidad samtang padayon ang monitoring sa kalihukan sa yuta .
