Kapin sa 1,700 ka mga estudyante ug magtutudlo sa Indonesia ang nasakit tungod sa gituohang food poisoning kon pagkahilo sa pagkaon human nakakaon og libreng pagkaon nga giapod-apod ubos sa ‘meal program’ sa gobyerno.
Ang pinakabag-o nga insidente natala sa usa ka senior high school sa Lasem, Central Java, diin 752 ka mga estudyante ug 25 ka mga magtutudlo ang nakasinati og kalibanga ug pagsuka human nakakaon og libreng pagkaon niadtong Miyerkules.
Sumala sa prinsipal sa eskwelahan, ang pagkaon naglakip sa sinugba nga manok.
Usa ka ‘food taster’ kon tigtilaw ug pagkaon ang nakamatikod nga ang ubang manok “lapot” sa wala pa kini giapod-apod.
Gawas sa insidente sa Lasem, 664 ka mga estudyante ang nasakit sa Sidoarjo, East Java, samtang 49 sa Nganjuk ug 237 sa Agam, West Sumatra, ang gitaho nga naapektuhan sa pagkahilo sa pagkaon karong semanaha.
Kini nagdala sa kinatibuk-ang gidaghanon sa mga kaso sa sakit nga nalambigit sa programa sa libreng pagkaon ngadto sa kapin sa 1,700.
