GENERAL SANTOS CITY – Sigurado na ang ihatag nga P3,000 ngadto sa matag job order workers sa lokal nga gobyerno sa dakbayan human nga giaprubahan sa konseho atol sa gipatawag nga special session kagahapon.
Matud pa ni Kag. Lulu Casabuena nga kapin sa 1,500 job order workers sa LGU Gensan ang makadawat sa maong financial assistance nga dakong tabang sa mga nasampit dungan sa giatubang nga krisis kalabutan sa covid 19.
Gani sa pahayag niini nga may report nga nadawat nga kalit nga misutoy ang presyo sa bugas og ubang palaliton sa dakbayan nga gipasusi na usab niini.
Gipaklaro ni Kag. Casabuena nga kadtong mga job order workers lang sa miaging tuig ang makadawat sa maong ayuda og walay apil kadtong karong tuiga lang nakasulod.
Samtang, sa bahin sa regular employees una nang gimando ni Pres. Duterte nga ihatag ang midyear bonus aron magamit sa katawhan sa krisis nga giatubang.
Ang P7.5 Million ang gikuha sa general fund sa syudad.
