Miabot na sa kapin 1,300 ka pulis ang natangtang sa serbisyo tungod sa nagkalain-laing kaso, isip kabahin sa padayon nga kampanya sa Philippine National Police nga limpyohan ang ilang hanay batok sa mga miyembro nga nakahimog krimen ug uban pang kalapasan.
Sumala sa PNP, nasulbad usab ang libo-libong administrative cases gikan Agosto 26, 2025 hangtod Hulyo 15, 2026.
Kapin 2,000 ka pulis usab ang gisuspinde, samtang 237 ang gipaubos sa ranggo. Ang uban usab gipahamtangan og silot sama sa forfeiture of salary ug opisyal nga pagbadlong.
Sa kinatibuk-an, miabot sa 4,534 ka pulis ang gihatagan og administrative penalties human masulbad ang 3,903 ka administrative cases.
Gipasalig sa kapolisan nga ipadayon nila ang hugot nga pagbantay sa ilang kaugalingong mga miyembro aron masiguro nga mahimong limpyo ang tibuok hanay sa PNP ug malikayan ang bisan unsang matang sa kalapasan sulod sa organisasyon.
