Miabot na sa 1,300 ka sandbag ang gitambak sa naguba nga bahin sa Bacolor-Sto. Tomas-Minalin Tail Dike sa Pampanga, human magpadala og 500 niadtong Agosto 30 ug dugang nga 800 karong adlawa.
Gihimo ang maong lakang isip temporaryong tubag sa pagkaguba sa bahin sa maong dike niadtong Sabado, Agosto 29, samtang gihulat ang aksyon sa mga otoridad.
Sumala sa mga report, mihuyang ug sa ulahi nahugno ang bahin sa dike human miapaw ang Gugu River tungod sa padayon nga pag-ulan nga dala sa Habagat.
Misangpot kini sa grabeng pagbaha sa pipila ka barangay sa mga lungsod sa Sto. Tomas ug Minalin. Tungod sa hulga sa kaluwasan, gilayon nga gipabalhin sa Pampanga Provincial Disaster Risk Reduction and Management Office o PDRRMO ug sa mga lokal nga panggamhanan ang mga pamilyang naapektuhan.
Tumong sa Local Government Unit nga mapugngan ang padayon nga pagkaguba sa dike, malikayan ang mas grabe nga pag-apaw sa tubig ug masiguro ang kaluwasan sa mga komunidad nga duol sa maong lugar.
Padayon usab ang pag-monitor sa Department of Public Works and Highways o DPWH ug PDRRMO sa kahimtang sa Tail Dike alang sa sunod nga mga lakang nga gikinahanglan.
