Kapin 100 ka panimalay ang naugdaw sa dakong sunog sa lungsod sa Drammen, Norway, sumala sa mga rescue official.
Naputos sa baga nga itom nga aso ang lugar nga nahimutang mga 50 kilometro gikan sa kaulohan nga Oslo.
Bisan pa sa kadako sa sunog, wala’y natalang namatay o nawala nga residente. Kapin 60 ka bombero ang gipadala aron pugngan ang pagkaylap sa kalayo, samtang migamit usab og mga helikopter nga nagsabwag og tubig gikan sa kahanginan.
Tungod sa kusog nga hangin, paspas nga mikatag ang kalayo ug nakaabot pa sa duol nga kalasangan, hinungdan nga gipabakwit sa mga awtoridad ang gatusan ka residente sa apektadong lugar.
Padayon pa ang imbestigasyon sa mga otoridad aron mahibal-an ang hinungdan sa sunog, samtang gihimo ang assessment sa kadak-on sa kadaot.
