GENERAL SANTOS CITY – Giklaro ni Geraldine Zamora, division head sa Business Permits and Licenses Division ning siyudad, nga wala nila gina-ipit ang mga investment schemes nga nanurok karon sa siyudad.
Dungan kini sa gipahigayon nilang pagtuyok kagahapong adlawa kauban si City PNP Director P/Col. Aden Lagradente sa General Santos City Police Office, sa mga gikaingong investment schemes sa siyudad alang sa pag-inspeksyon kon may mga paigong dokumento ug aron masuta kon ligal ang pag-operate dinhi sa siyudad.
Kahibaluan nga lakip sa mga gi-inspeksyon mao ang WBA nga nahimutang sa Alunan, Bula; Munificence Ministry sa Brgy Bula gihapon nga nagtanyag ug 45%, nga gikaingong implementing arm sa usa ka ministry; Act of Charity Consumer Goods Trading nga nahimutang sa J. Catolico Avenue, Lagao nga nagtanyag usab ug 37% nga interes; Family First nga nahimutang sa Mabuhay Road; Management Consultancy Service; KAPA sa Prk Masunurin, Brgy San Isidro; ug ang ALAMCCO apan sirado dihang giadtuan sa mga otoridad.
Samtang ang gikaingong hugot nga karibal matud pa karon sa KAPA nga NMC Trading sa Purok Malakas tungod sa tanyag niining interes nga miabot matud pa sa 400% nga interes lakip usab sa gi-inspeksyon.
Una niini daw nakaangkon na matud pa ug pag-ilogay sa mga investors ang pagdaghan sa investment scheme sa South Central Mindanao.
Usa sa nakabati na matud pa sa epekto sa hinay hinay nga pagkunhod sa ihap sa mga investors ang KAPA.
Nasayran nga namalhin na matud pa ang daghangh investors sa KAPA, sa bag-o na usab nga investment group nga gilabwan ang ilang 30% nga gitanyag nga tubo.
