Gisaway ni kanhi presidential spokesman Salvador Panelo si Department of Justice (DOJ) Secretary Jesus Crispin Remulla human ang pahayag sa kalihim nga mamahimong makig-istorya ang Pilipinas sa Internationa Criminal Court (ICC) kabahin sa imbestigasyon sa drug war sa nakalabay nga administrasyon.
Matod kang Atty. Panelo, angayang muhawa na sa pwesto si Remulla ug uban pang miyembro sa gabinete ni Pang. Ferdinand Marcos Jr. kung dili nila gusto sa naunang pahayag og polisiya sa presidente kabahin sa International Criminal Court (ICC).
Gihingusgan usab sa kanhi Presidential Legal Counsel nga dakong kaulaw sa kasamtangang presidente si Remulla og ang uban pang nagakontra sa opisyal nga posisyon ni Marcos kabahin sa ICC.
Isip mga alter ego sa presidente, angayan lamang nga musunod ang mga nasampit sa polisiya sa presidente apan angayan usab nga magresign na kung dili sila komportable sa posisyon sa presidente o kung kontrahon man nila ang polisya niini.
Dungan niini gibarugan ni Panelo nga tama si Pang. Marcos sa iyang pahayag nga walay hurisdiksyon ang ICC sa Pilipinas.
Ang pagsulod sa ICC ang daw pagbutang niini sa Pilipinas ilawom sa iyang hurisdiksyon ang daw pag-insulto sa teritorial integrity og soberanya sa nasod.
Kahibaluan nga unang mihawa ang Pilipinas gikan sa Rome Statute niadtong 2019 human sa pag-anunsyo sa ICC nga mag-imbestiga kini sa matod pa mga extrajudicial killings ilawom sa drug war ni kanhi Pang. Rodrigo Duterte.
