Nadakpan si kanhi Police Colonel Royina Garma ug iyang anak nga si Angelica Garma Vilela sa San Francisco, California, USA niadtong Nobyembre 7, matod sa Department of Justice (DOJ).
Kini ang gikumpirmar sa Philippine National Police (PNP) ug Department of Interior and Local Government (DILG).
Matud ni PNP PIO Chief & Spokesperson PBGen. Jean Fajardo, basi kini sa ilang komunikasyon sa directorate for intelligence sa PNP.
Sa pagkakaron, si Garma ug ang iyang anak giingong anaa sa US immigration detention.
Wala pay impormasyon ang nasudnong kapolisan basi sa pagkasikop, apan giklaro ni PBGen Fajardo nga walay hold departure order nga giluwatan ang korte ngadto kang Garma ug gibuhian siya sa kustodiya sa Kongreso mao nga nakagawas siya sa nasod.
Gawas niini, wala pay kaso nga napasaka batok kang Garma hangtod karon.
Kahinumduman nga usa si Garma sa mga nitestigo sa giingong EJKs ug reward system sa kampanya batok sa ilegal nga drugas sa administrasyon ni kanhi presidente Rodrigo Roa Duterte.
Samtang, matod ni Secretary of Justice Jesus Crispin “Boying” Remulla, iyang gitahasan si Commissioner Joel Viado nga mangulo sa pagpauli kang Garma gikan sa Amerika balik sa Pilipinas.
Nanghinaot ang DOJ nga bisan pa man nga gilibkas na sa kongreso ang ilang contempt order, mokooperar gihapon si Garma sa nagpadayong imbestigasyon sa Gobyerno kalabot sa mga isyu nga giatubang sa war on drugs campaign ni kanhi Presidente Rodrigo Roa Duterte.
