Sama sa gila-uman, wala mutunga si kanhi Pangulong Rodrigo Duterte sa ikasiyam nga pagdungog sa House Quad Committee aron unta makuhaan sa iyang panig sa ilang gi-imbestigahang extrajudicial killings (EJKs) atol sa gipatuman niyang duguong drug war.
Base sa sulat nga gipadala sa iyang abogado nga si Atty. Martin Delgra III, nakalatid nga gustuhon man sa pangulo nga mutambong sa pagdungog apan dili maayo ang paminaw niya sa iyang kaugalingon rason nga mihangyo kining i-excuse una siya sa maong pagdungog.
Dinhi na gikwestyon ni Congressman Joseph Stephen ‘Caraps’ Paduano, chairman sa House Committee on Public Accountability, kung tugutan ba ang rason sa kanhi presidente nga wala man lay gipataban nga medical certificate sama sa gipangita nila sa ubang absent nga mga resource persons.
Dinhi na mipasabot ni House Quad Overall chairman Robert Ace Barbers nga sa pagkakaron, mahimo pang hatagan og konsiderasyon ang rason sa kanhi presidente tungod kay nagpadala man kanila og sulat ang abogado niini kansa una nang gisupak ni Paduano.
Tungod kay mi-init na ang maong hisgutanan, nag-break og usa ka minuto ang komite ug dinhi na gipadayag ni Paduano nga mi-uyon siya sa sugyot ni Congressman Barbers.
Apan iyang gisugyot nga kinahanglang duna’y authorization gikan sa kanhi pangulo nga iyang gitugutan si Atty. Delgra nga mahimo niyang representante isip pagsunod sa house rules.
