Gikumpirma sa International Criminal Court Trial Chamber III nga himsog ug adunay kapasidad si kanhi Pangulong Rodrigo Duterte nga motambong ug moatubang sa mga pagdungog sa korte.
Matud sa Trial Chamber III, nakontento sila sa mga medical examination nga gihimo sa mga eksperto ug igo ang mga ebidensiya nga nagpakita nga adunay kapasidad ang kanhi pangulo nga motambong sa pagdungog.
Magpatuman usab ang Trial Chamber III og mga pamaagi aron masiguro ang pag-apil ni Duterte sa pagdinig nga magsugod sa Nobyembre 30, 2026.
Matud pa, atol sa ikatulong status conference niadtong Septiyembre 16, gihangyo sa abogado sa kanhi pangulo ang Chamber nga, kung mahimo, ipahigayon ang dugang nga medical examination kang Duterte.
Gipangatarungan sa abogado ni Duterte nga base sa mga miaging medical examination, makita nga aduna na kini’y mga timailhan sa pagkakalimtanon.
Sa maong desisyon, gimandoan usab sa Trial Chamber III ang International Criminal Court Registry nga mangandam alang sa umaabot nga pagdungog.
Girekomenda sa Registry nga mahimong moapil ang kanhi pangulo pinaagi sa video conference, kung tugotan kini sa Chamber, ug mahimo gihapon siyang makigkomunikar sa iyang mga abogado.
Atubangon ni Duterte ang kaso nga crime against humanity nga may kalabotan sa iyang kampanya batok sa ilegal nga droga atol sa iyang termino isip pangulo sa nasud ug kaniadto isip mayor sa Davao City.
