Midawat sa tanyag sa Los Angeles Lakers nga mahimong head coach sa team si NBA analyst ug kanhi shooting guard sa LA Clippers nga si JJ Redick.
Bisan og dili pa klaro sa pagkakaron ang kinatibuk-ang kontrata ni Redick, ang General Manager sa Lakers nga si Rob Pelinka mismo ang mitanyag kaniya sa maong posisyon ug gidawat dayon kini sa kanhi NBA guard.
Gipangita dayon ni Redick ang iyang mga kaubang coaches ug staff human sa pagdawat sa maong posisyon.
Sa tibuok karera ni Redick sa NBA, wala pa siya nag-coach sa bisan unsang team sa liga.
Una siya miretiro niadtong 2021, human sa 15 ka season nga adunay unom ka lain-laing NBA teams.
Human sa iyang pagretiro niadtong 2021, misulod dayon siya isip NBA analyst sa usa ka TV network.
Bantog nga gipalagpot sa Lakers ang ilang kanhi head coach nga si Darvin Ham niadtong Mayo, human sa iyang duha ka season sa Lakers.
Sa pagserbisyo ni Ham isip head coach sa Lakers, nakasulod siya sa team sa Western Conference Finals apan napildi sab kini sa Denver Nuggets nga sa ulahi gikoronahan nga NBA Champions.
