Gipanghimakak ni kanhi House Speaker ug Leyte Representative Martin Romualdez ang alegasyon nga siya ang luyo sa pag-atras sa affidavit sa upat ka kanhing bodyguard ni kanhi Ako Bicol Party-list Representative Zaldy Co, nga nailhan isip “maleta boys.”
Matud ni Romualdez, walay kamatuoran ang maong akusasyon ug walay iyang kalabotan sa desisyon sa mga testigo sa pagbawi sa ilang mga pahayag. Dugang pa niya, ang maong pag-atras nagpakita lamang nga walay basehan ang mga alegasyong nagdugtong kaniya sa gipasanginlang flood control anomaly.
Samtang, gibutyag ni Ombudsman Jesus Crispin Remulla nga posible pang maatubang og kaso ang mga kanhing bodyguard nga mibawi sa ilang mga affidavit, ilabina kung naghatag sila og magkalahi nga mga pahayag.
Padayon sa pagkakaron ang imbestigasyon sa Office of the Ombudsman sa mga reklamong plunder, graft ug direct bribery batok kang Romualdez nga may kalabotan sa gipasanginlang flood control scandal.
