Nakabsan sa kinabuhi ang kanhi Undersecretary sa Department of Public Works and Highways (DPWH) nga si Catalina Cabral human kini matud pa nahulog sa usa ka pangpang sa Kennon Road, Tuba, Benguet kagahapon sa hapon.
Base sa impormasyon gikan sa Benguet Provincial Police Office, ang drayber ni Cabral mismo ang nipahibalo sa kapulisan mahitungod sa panghitabo. Matud sa drayber, samtang nagbiyahe sila paingon sa La Union pasado alas-3 sa hapon, nihangyo si Cabral nga mohunong ug magpabilin kadiyot sa Kennon Road.
Nibiya ang drayber paingon sa usa ka gasoline station apan pagbalik niini pagka alas-5 sa hapon, wala na niya makit-i ang kanhi opisyal. Human gipangita sa hotel ug wala gihapon makit-an, nidangop ang drayber sa kapulisan pagka alas-7 sa gabii. Pagka alas-8 sa gabii, napalgan si Cabral nga wala nay panimoot sa daplin sa Bued River, mga 20 metros ang gilay-on paubos gikan sa maong dalan. Gidala na ang patay’ng lawas ni Cabral sa usa ka lokal nga punerarya.
Taliwala sa maong trahedya, nagmando si Assistant Ombudsman Mico Clavano sa mga awtoridad sa Benguet nga kuhaon ug ampingan ang cellphone ug uban pang mga gadgets ni Cabral aron i-turnover sa mga imbestigador sa saktong panahon.
Kahinumduman nga si Cabral nalambigit kaniadto sa mga pasangil mahitungod sa “budget insertions” ug “kickbacks” sa mga multibillion-peso nga flood control projects. Hugot kining gipanghimakak ni Cabral sa wala pa siya mokanaog sa iyang pwesto isip Undersecretary for Planning and Public-Private Partnership.
