Posibleng nakabreak sa world record ang kanhi college track star nga si Stephen Biebelhausen human makadagan og usa ka milya sulod lang sa 4 minutes ug 17 seconds samtang nagtulod sa stroller sa iyang anak.
Si Biebelhausen, kanhi runner sa Miami University sa Ohio, miapil sa Guardian Mile race nga gihimo sa Hope Memorial Bridge sa Cleveland, diin iyang gitulod ang iyang anak nga si Blake samtang nagdagan.
Natapos niya ang usa ka milyang lumba sa oras nga 4 minutes ug 17 seconds.
Kung mapamatud-an ug ma-verify sa Guinness World Records ang iyang oras, iya nang mailog ang rekord alang sa pinakapaspas nga usa ka milya nga dagan samtang nagtulod og pram gikan kang Silas Frantz, nga nakarekord og 4 minutes ug 26.29 seconds niadtong Hunyo 2025.
Matod ni Biebelhausen, wala gyud siya magdahom nga makigsangka alang sa world record, tungod kay ang iyang tumong lamang mao ang mabuntog ang course record nga 4 minutes ug 44 seconds ug makasulod sa 4:30 range.
Gipahayag usab sa kanhi runner nga nagtuo siya nga mahimo pa niyang mapaspasan ang iyang oras kung makadugang pa siya og training.
Matod niya, adunay pa siyay ikapauswag sa iyang nahimo nga rekord.
