Gisentensiyahan sa korte sa apela sa South Korea ang kanhi Chief Justice sa Korte Suprema nga si Yang Sung-tae og unom ka bulan nga pagkabilanggo, gisuspinde sulod sa usa ka tuig, tungod sa giingong pag-abuso sa iyang gahum ug ilegal nga pagpanghilabot sa mga husay.
Gipakanaug sa Seoul High Court ang sentensiya niadtong Biyernes, Enero 30, nga nagbali sa naunang desisyon sa ubos nga korte nga nag-abswelto kang Yang sa tanang 47 ka mga kaso batok kaniya.
Sumala sa prosekusyon, si Yang, kinsa nagsilbi nga chief justice gikan sa 2011 hangtod 2017, migamit og daghang mga kaso sa korte isip tabon o kapuli sa mga pakigsabot sa administrasyon ni Presidente Park Geun-hye niadtong panahona.
Ang prosekusyon miingon nga ang tumong mao ang pagkuha og suporta alang sa pagtukod og usa ka lahi nga korte sa apela.
Ang prosekusyon nangayo og pito ka tuig nga sentensiya sa pagkabilanggo alang kang Yang, apan ang korte sa apela nagpahamtang og mas gaan nga sentensiya.
Sa samang kaso, ang kanhi Justice sa Korte Suprema nga si Park Byong-dae gisentensiyahan usab og unom ka bulan nga pagkabilanggo uban ang usa ka tuig nga suspensyon, samtang gipadayon sa korte ang pag-abswelto kang kanhi Justice Ko Young-han.
