Gikwestyon sa spokesperson ni Vice President Sara Duterte nga si Atty. Paolo Panelo ang pagbalik sa paghisgot bahin sa 16-vote threshold alang sa conviction sa impeachment trial.
Sumala kang Panelo, kinahanglan ikonsiderar ang mga sitwasyon nga makaapekto sa pagtambong ug pag-apil sa mga senator-judge sa dili pa usbon ang ihap nga mahimong basihan sa pagboto.
Gipahayag ni Panelo kini human madungog sa Senate impeachment court ang nagkalain-laing panan-aw sa mga retiradong mahistrado sa Korte Suprema nga giimbitar isip Amici Curiae o “Friends of the Court.”
Matod niya, kung ipaubos ang denominator o ihap nga basihan sa two-thirds requirement, mahimong maapektuhan ang resulta depende kung kinsang mga senador ang makatambong o makaboto.
Dugang pa ni Panelo nga ang voting threshold kinahanglan hisgotan uban sa konteksto sa mga senador nga mahimong dili makaapil tungod sa mga kasong gipasaka batok kanila o hulga sa legal nga aksyon.
