Niapelar ang kampo ni kanhi Presidente Rodrigo Duterte sa desisyon sa Pre-Trial Chamber nga ibasura ang ilang hagit nga ang kaso nga giatubang sa kanhi presidente wala sa hurisdiksyon sa International Criminal Court.
Ang maong apela gipangulohan ni Nicolas Kaufman, lead counsel, ug ni DR Dov Jacobs, Associate Counsel sa kanhi presidente.
Gusto sa kampo sa kanhi presidente nga balihon ang desisyon nga gi-isyu niadtong Oktubre 23.
Gipahayag usab sa apela nga walay legal nga basehan para sa ICC nga ipadayon ang pagdungog sa kaso sa kanhi presidente.
Gihangyo usab sa kampo niini ang hinanali ug walay kondisyon nga pagpagawas kang Duterte.
Mahinumduman nga ang kanhi Presidente gidakop niadtong Marso 11 tungod sa mga krimen batok sa katawhan nga naggikan sa iyang kampanya batok sa ilegal nga droga atol sa iyang panahon isip presidente.
