GENERAL SANTOS CITY – Hugot na ang training nga gipahigayon sa Team Pacquiao isip pagpangandam sa nagkaduol nga away sa Abril 20, 2024.
Matud pa kang Assistant Coach Roger Fernandez, walay kalahian sa regular fight ang training nga gipahigayon isip pagpangandam batok sa Thai mix martial arts fighter nga si Buakaw Banchamek.
Ang maong away ipahigayon sulod sa unom nga rounds og tulo ka minuto gihapon ang idugay sa matag round.
Base sa nakasabotan nga magboksing lang ang duha og dili pwedeng gamiton ni Buakaw ang ubang sports discipline.
Nasayran nga gikonsidera usab nga legendary fighter sa natad sa mixed martial arts si Buakaw tungod sa impresibo niining record nga adunay katibuk-ang 280 nga away, 241 ang iyang napadaog og 73 ang napadaog via knockout, samtang 24 usab ang pildi.
Sa pikas bahin adunay record usab si Pacquaio nga 60 nga daug, upat ang pildi sa iyang amateur career, 62 ka daog walo ang pildi og duha ang draw isip professional boxer, og 39 niini ang iyang napadaog via knockout.
Samtang nasayran sa Bombo Radyo gikan sa reliable source nga ang maong exhibition fight magsilbi nga tune-up sa 8 division world boxing champ sa rematch kontra kang undefeated American boxer Floyd Mayweather nga posibleng ipahigayon sa bulan sa Hunyo.
