GENERAL SANTOS CITY – Mas gipakusgan pa sa kapulisan ang “Balik-baril Program’ ang kampanya batok sa loose firearms.
Base sa datos sa Police Regional Office 12, adunay 34,707 ka mga registered gun owners sa tibuok rehiyon.
Apan sa karon, aduna pa lamang matud pay 5,170 nga nakakuha ug License To Own and Possess Firearm (LTOPF).
Nagpasabot kini nga aduna pay 29,537 ang ihap sa makonsiderang iligal nga armas ning higayuna sa rehiyon.
Samtang, base gihapon sa datos sa PRO-12, ning tuiga kapin na sa 600 ka search ug buybust operation ang gipahigayon sa kapulisan batok sa iligal nga paghupot ug armas kung asa dul-an 600 na usab ang narekober nila nga armas.
Mukabat usab matud pa sa 300 ka mga tawo ang nasikop, ug 200 ka tawo ang nakasuhan tungod sa dili lisensyado nga armas.
Samtang anaa matud pa sa 1,242 ka mga armas ang gitahan sa kapulisan sa tibuok Region 12. Labing daghan ang gikan sa Sultan Kudarat, sunod sa North Cotabato, ug Cotabato City.
Gipasalig sa PRO-12 nga maayo ang pagkakustodiya sa mga nakumpiska nga armas, ug gisiguro nga wala nila kini gi-recycle sa mga ginapahigayon nga operasyon.
