GENERAL SANTOS CITY – Nagpaklaro si Joel Gavina, Airport Manager sa Civil Aviation Authority of the Philippines kon CAAP GenSan kalabutan sa kainit sa sulod sa airport sa dakbayan.
Matud pa ni Gavina nga may paigo nga aircon apan kulang ang supply sa kuryente hinungdan nga kasamtangan gi-upgrade na ang power supply.
Sa pagkakaron giasikaso na ang tanan og gilauman nga sa katapusan sa bulan sa Oktobre mahuman na og dili na mahimong init ang sulod sa airport.
Dungan niini nangayo og pagpasabot ang maong opisyal sa katawhan sa kasamtangang sitwasyon.
Kahibaluan nga base sa migawas nga video nga gibutangan og tubig ang cooler fan nga makadugang og kabugnaw sa airport.
Sa pamahayag ni Gavina nga nagdugang usab sila og mga wall fan sa palibot.
Gibutyag nga nangatuklap ang mga ubang parte sa kisame sa airport tungod sa hilabihan kainit nga temperatura.
Nasayran nga sa miaging tuig lang giinagurahan ang bag-ong GenSan airport nga nagkantidad og kapin sa P900 million ang kantidad.
