“Kinahanglan ang reboot.”
Kini ang pamahayag ni Senador JV Ejercito human ni-resign si Kongresista Martin Romualdez isip House Speaker.
Matod ni Ejercito, adunay kausaban sa liderato sa Senado kaniadto ug matod niya nga panahon na sa pagbag-o sa liderato sa Ubos Balay Balauranan sa Kongreso.
Samtang, gihangop ni Senador Francis “Chiz” Escudero ang pagkapili ni Isabela 6th District Rep. Faustino “Bojie” Dy III isip bag-ong Speaker of the House.
Matod ni Escudero, dugay na niyang nakaila si Dy ug masaligon nga magamit niya ang iyang kasinatian ug lig-on nga liderato sa paggiya sa Kamara taliwala sa mga kritikal nga isyu nga giatubang sa nasud.
Hinuon, ang senador niinsistir nga ang transisyon sa pamunoan dili angayng rason aron makalimtan ang mga isyu kalabot sa nangaging mga budget ug anomaliya sa mga proyektong imprastraktura.
Gipaabot usab ni Escudero ang iyang pagtimbaya ug suporta ngadto sa bag-ong Speaker ug nanghinaot nga tumanon niya ang iyang mga katungdanan nga may integridad ug mas makatubag sa panginahanglan sa katawhan.
Karon nga duna nay bag-ong House Speaker, nanghinaot si Senate Committee on Finance Chairman Senador Sherwin Gatchalian nga si Cong. Mikaela Suansing magpabilin isip pangulo sa House Appropriations Committee.
Gipasabot ni Gatchalian nga aduna na silay koordinasyon ni Suansing kalabot sa budget bill.
Matud pa usab sa senador nga suportado ni Suansing ang tumong nga himuong abli ug transparent ang budget deliberations, ug kini napamatud-an sa ilang pagdapit sa civil society organizations (CSOs) ug non-government organizations (NGOs) nga mosalmot sa mga hearing.
Apan, nagtuo si Gatchalian nga kon mapulihan si Suansing isip chair sa Appropriations Committee, dili malangan ang pagpasar sa 2026 National Budget.
Matod niya, basta magpabilin ang kasamtangang mga sakop sa komitiba, magpadayon ang diskusyon sa proposed budget.
