GENERAL SANTOS CITY -Kulatado ang usa ka lalaki human nga naabtan kini sa bana nga kauban ang asawa sulod mismo sa balay sa magtiayon.
Giila ang maong lalaki nga si Jason Onding, nga residente sa Lower Makar Labangal ning syudad.
Sa pakighinabi sa Bombo Radyo, gibutyag ni Japar Edon, nga siya mismo ang nakasakop nga magkauban sulod sa kuwarto ang iyang asawa og ang lalaki alas 8:00 sa gabie.
Sa iyang pamahayag nga nagdali-dali siya ug uli gikan sa trabaho human nga nabasahan niya ang bayluanay og mensahe sa iyang asawa og sa lalaki sa mga chat nila sa Facebook.
Matud pa, wala na-log-out sa iyang asawa ang iyang account human nga nakalimtan hinungdan nga nabisto ang binuhatan sa asawa nga adunay laing gikabuangan nga laing lalaki.
Niadtong tungura nga niuli siya, naniid og wala gilayon misulod sa ilang balay. Dihang gipalong na ang kandila gikan sa ilang kuwarto, didto na siya misulod ug nakit-an ang asawa og ang lalaki nga magkauban.
Nasayran nga misibat gilayon ang babaye gikan sa ilang balay human nga nabisto sila sa iyang kabit nga gikulata pag-ayo sa iyang bana..
Samtang, giangkon ni Onding, nga wala siya nasayod nga dakong minyo ang babaye nga nakaila niya sa Facebook duha ka semana ang nakalabay.
Kini nagresulta sa sige ug pagkitaay sa duha, nga usahay sa balay pa mismo sa babaye.
Sa iyang pamahayag nga una pa sila nabisto sa bana, mi-chat kaniya ang babaye nga paadtuon sa ilang balay hinungdan nga miadto.
Apan wala siya magdahum nga ang ga-chat kaniya mao na ang bana sa babaye.
Gikabutyag nga nalimtan sa babaye nga i-log out ang iyang FB account hinungdan nga ang tanang bayluanay nila og mensahe ang nabasahan sa bana.
Sa pamahayag ni Onding, nga tungod walay kauban ang babaye nga matulog sa ilang balay, hinungdan nga iyang kuyogan tungod matud pa delikado nga mag-inusara ang nasampit tungod ngitngit ang palibot gumikan walay kuryente ang balay.
Luyo sa katarungan sa lalaki, desidido gihapon ang bana nga magpasaka og kasong adultery batok sa iyang asawa og sa kabit niini.
Ang screenshot sa mga bayluanay og mensahe sa duha ang wala gipapha sa bana og gitipigan aron ebidensiya sa pagpasaka og kaso.
