Gipahayag ni Senate Committee on Youth ug Committee on Sports Chairman Senador Bong Go ang dakong kabalaka sa nagkadakong impluwensya sa social media sa pagporma sa pamatasan ug personalidad sa mga kabatan-onang Pilipino sa karon nga panahon.
Matud sa senador, isip mga ginikanan ug magbabalaod, dili angay pasagdan ang maong kahimtang nga padayon nga makaapekto sa umaabot nga henerasyon.
Gipaambit kini ni Go atol sa pagdungog sa Senado kagahapon Huwebes sa buntag, kalabot sa makalilisang nga pagpamusil sa Zamboanga City bag-ohay lang nga mipatay sa pipila ka mga estudyante.
Tungod niini, gipunting sa magbabalaod nga panahon na aron dasigon pag-usab ang mga kabatan-onan nga mogahin og panahon alang sa physical fitness ug sports aron malikayan ang negatibong epekto sa sobra nga paggamit sa gadgets ug social media sa ilang mental health.
