GENERAL SANTOS CITY – Gipapha ni Kag. Rock Garay sa Brgy Dadiangas South, ang kabalaka sa katawhan hilabi na sa industriya sa tuna dinhi sa dakbayan, ang nahimong pagpa-recall sa US sa mga fresh frozen tuna products gumikan sa kontaminasyon sa Hepatitis A virus.
Matud ni Kag. Garay, usa kadto ka isolated case ug gikan lamang sa usa ka kumpanya, ug wala nagpasabot nga kontaminado na ang tanang fresh frozen tuna products dinhi sa dakbayan, ug sa tibuok Pilipinas, hilabi na nga daghan pa ug mga nagkalain-laing tuna processors.
Hinuon, tungod sa nahitabo, mas nahimo pang istrikto sa sanitary standard operating procedure, aron mapaniguro nga luwas sa unsa mang kontaminasyon ang mga nahisgutang produkto.
Lauman matud pa nga makaapekto gayud kini sa industriya sa tuna sa nasud, apan dili matud pa angayang mag-panic.
Samtang, lauman nga magpahigayon ug panagpulong ang Fresh Frozen Tuna Association sa dakbayan, alang sa himuong lakang kalabot sa naasoy’ng problema.
Alang kang Kag. Garay, basin ug may nasagol lamang sa mga frozen tuna nga gikabutyag nga kontaminado, hilabi na nga may nakadugang kini nga shipment.
Gatuo usab siya nga ang food handler ang may problema ug dili ang produksyon.
