GENERAL SANTOS CITY – Gipapha ni OIC City PNP director Ruel Berango, labaw sa General Santos City Police Office, ang kabalaka sa katawhan gumikan sa namatikdan nga mga tangke sa kasundaluhan ug gidugangan nga checkpoints sa dakbayan.
Sumala pa nga kabahin lamang kini sa nakasabutan nga lakang human sa natigayon nilang crisis management committee meeting kauban si Mayor Ronnel Rivera ug mga department heads, may kalabutan sa pagpataas sa alert level sa siyudad, duha ka semana na ang nakalabay.
Kini human matud pa sa natigayong pagbusikad sa usa ka IED sa Brgy Calumpang, gawas pa sa nahimong pagsaulog sa Kalag-kalag miaging semana.
Gibutyag ni Berango nga sa naasoy’ng meeting, girekomenda sa Joint Task Force-Gensan nga magmuntar ug random checkpoints, lakip ang installations sa mga artillery vehicles sama sa tangke.
Apan giklaro ni Berango nga kabahin lamang kini sa hugot nga pagbantay sa seguridad.
Gikabutyag usab nga gipaabot na lamang matud pa nila karon kon ipaubos na o imintina ang alert level.
