Gikansela sa K-pop girl group nga Momoland ang ilang “10th Anniversary FAN-CON (Very Merry Party)” sa Pilipinas.
Sumala sa grupo, dili madayon ang maong kalihokan tungod sa wala damhang problema. Gikatakda unta kining ipahigayon sa sunod bulan, karong Agosto 8 sa Quezon City.
Tungod niini, nangayo og pasaylo ang Three Angles Production sa mga fans sa grupo human sa pagkansela sa maong kalihokan.
Gipasalig usab nila nga ibalik ang kwarta sa tanang nakapalit og mga tiket alang sa maong fan-con.
Namugna ang Momoland niadtong 2016, ug naila sila sa mga kanta nga “Bboom Bboom,” “Baam,” “I’m So Hot,” ug “Thumbs Up.”
Apan niadtong 2020, nabawasan og duha ang ilang mga miyembro ug unom na lamang ka miyembro ang nahibilin.
Ang katapusang pagbisita sa grupo sa Pilipinas nahitabo niadtong 2022, sa wala pa sila opisyal nga nagbuwag paglabay sa usa ka tuig.
