Nag-atubang na og lisod nga desisyon ang dugay nang big man sa Gilas Pilipinas nga si June Mar Fajardo bahin sa iyang kaugmaon sa national team, ilabina tungod sa iyang edad ug kahimtang sa lawas.
Gibutyag ni Gilas head coach Tim Cone nga human sa ilang dula batok Australia sa miaging window sa FIBA World Cup Asian Qualifiers, mipahibalo si Fajardo sa team nga plano na niyang moretiro sa national team.
Apan gihangyo siya ni Cone nga mosul-ob pag-usab sa Gilas jersey alang sa duha ka importanteng dula sa Window 4, ug miuyon si Fajardo nga mosuway pa sa makausa.
Matod sa 36-anyos nga si Fajardo, posible nga mao na kini ang iyang kataposang duha ka dula alang sa national team tungod kay gibati na niya ang mga kasakit sa lawas ug dili na niya gustong ipugos pa kini sa limitasyon, ilabina human sa iyang naagian nga injury sa tibia.
Sulod sa kapin usa ka dekada, naka-68 ka dula si Fajardo alang sa Pilipinas sukad sa iyang debut sa Gilas niadtong 2013, lakip ang tulo ka FIBA World Cup niadtong 2014, 2019 ug 2023.
Kabahin usab siya sa Gilas team nga nakadaog og gold medal sa Asian Games ug nagtapos sa 61 ka tuig nga paghulat sa Pilipinas alang sa maong titulo.
Matod ni Fajardo, panahon na tingali aron hatagan og higayon ang mga batan-ong magdudula nga mopadayon sa iyang gibiyaan nga papel sa national team, ug iyang gimention ang batan-ong si Justin Arana nga usa sa mga adunay dakong potensyal alang sa kaugmaon sa Gilas.
