GENSAN – “Judicial independence.” Kini karon ang handum sa Integrated Bar of the Philippines South Cotabato- General Santos (IBP-SocGen), kalabot sa panawagan aron papanaugon sa pwesto si Chief Justice Maria Lourdes Sereno.
Matud kang Atty Doan Balboa sa IBP-SocGen, nakadawat sila ug sulat aron mutambong sa flag ceremony sa Hall of Justice kagahapong adlawa.
Nagmeeting matud pa sila kung asa nahisgutan ang mamahimo nilang baruganan kalabot sa isyu.
Sumala pa, dili nila ginasuportahan, apan wala usab ginakondena ang punong mahistrado. Kon may nahimo man matud pang sayop si Sereno, angayan lamang nga i-agi sa due process pinaagi sa impeachment proceedings, ug dili sa pagpressure niini.
Dugang pa ni Atty Balboa, kung magpadayon ang mga “call for resignation” ug uban pang lakang aron awhagon nga mukanaog sa pwesto si CJ Sereno, makwestiyon na matud pa ang independence sa judiciary branch sa nasud.
Kahibaluan nga natigayong flag ceremony kagahapong adlawa sa mga korte sa GenSan, kamatikdan ang pipila ka mga huwes ug empleyado nga nagsul-ob ug pula nga kurbata, sapatos, t-shirt ug uban pa, isip pakighiusa sa Red Monday Protest.
